༄༅།། བོད་ཆེན་པོའི་རྒྱལ་སྲིད་ལ་མཛད་རྗེས་ཆེ་བའི་མི་སྣ་དྲུག
སྤེལ་དུས།  2017-09-02  རྡེབ་ཚད།   ཡོང་ཁུངས། གླིང་སྲས་བོད་ཡིག་འཕྲིན་སྟེགས།  རྩོམ་པ་པོ། རྫ་བ་ཚུལ་ཁྲིམས་ནོར་བུ།  རྩོམ་སྒྲིག་པ། lobsang

གཅིག   ཁྱུང་པོ་སྤུང་སད་ཟི་ཙེ།  མི་འདི་རིག་པ་རྒོད་ཅིང་གཡོ་འཕྲུལ་ཆེ་བ། མངོན་ཤེས་ལྟ་བུའི་རྗེས་དཔག་དང་གཏན་ཚིགས་ལ་མཁས་ཤིང་། སྐབས་དེའི་ཆབ་སྲིད་ཀྱི་གོ་ས་མཐོ་ཤོས་ཀྱི་གྲས་ཡིན། འདིས་གཙང་གི་རྒྱལ་པོ་མར་མུར་གྱི་མགོ་བཅད་ཅིང་། གཙང་གི་དུད་ཁྱིམ་ཉིང་ཁྲི་ཙམ་བཙན་པོ་ལ་ཕུལ་ཞིང་། བཙན་པོས་དེ་ཕྱིར་གནང་ནས་གཙང་གི་མངའ་འབངས་ཀྱི་བདག་པོར་བསྐོས། མི་འདིས་བཙན་པོའི་སྐུ་སྲོག་སྐྱབས་པའི་ལོ་རྒྱུས་ཡོད། མཐར་བཙན་པོ་སྲོང་བཙན་ལ་ངོ་ལོག་ཅིང་རང་གི་ཆབ་སྲིད་བུའི་ལག་ཏུ་སྟེར་ནས་རིགས་རྒྱུད་ཕྱི་མ་རྣམས་གོ་གནས་ཉམས་མོས་སུ་མི་འགྲོ་བའི་ཆེད་དུ་རང་གི་མགོ་རང་གིས་བཅད་དེ་བཙན་པོའི་ཕྱག་ཏུ་བསྐུར།Bhk

གཉིས། སེང་གོ་མྱི་ཆེན།  མི་འདི་དྭགས་པོ་ལ་དམག་དྲངས་མཁན་གྱི་དམག་དཔོན་ཞིག་ཡིན་ཞིང་། རྒྱལ་བློན་འཛོམས་པའི་དབུས་སུ་དྭགས་པོར་འགྲོ་རྒྱུའི་ཁས་བླངས་ཤིང་། དམག་ཤུགས་དང་དཔའ་མཛངས་གཉིས་ལྡན་གྱི་མི་ཞིག་ཡིན་ལ། འདིའི་བློན་པོ་ཞིག་གིས་ཉིན་གཅིག་ལ་དྭགས་པོ་བརྒྱ་བསད་པའི་ལོ་རྒྱུས་ཡོད། འདིས་དྭགས་པོ་དབང་དུ་བསྡུས་པའི་སྐབས་སུ །འབངས་ཀྱི་ཁ་ནས། སེང་གོ་མྱི་ཆེན་གྱིས།། དྭགས་ཀྱི་བསེན་མཁར་ལ།། མདུང་མོ་ཐབས་གཅིག་གིས།། འབྲོང་མོ་ཐང་གང་ཐོབ།། ཅེས་པར་གྲགས། འདི་ལ་བཙན་པོས་གོ་གནས་ཆེན་པོ་སྤྲད་ཡོད་ཅིང་། འདིས་བླངས་པའི་ཁྱུང་པོ་སྤུང་སད་ལ་ཤགས་ལན་བཏབ་པའི་མགུར་ཞིག་ཀྱང་ཡོད།Bhk

གསུམ། མང་པོ་རྗེ་ཞང་སྣང་།  མི་འདི་མགུར་ལ་མཁས་ཤིང་བློ་རིག་བཀྲ་ལ་མཛངས་པ་ཞིག་ཏུ་སྣང་། ཁྱུང་པོ་སྤུང་སད་ཟི་རྩེས་བཙན་པོ་ལ་ཟུར་ཟའི་མགུར་བཀུག་པར་འདིས་ལན་གནད་དུ་ཁེལ་བ་བཏབ་ཅིང་། བཙན་པོས་ཀྱང་ཁོང་ལ་ཆབ་སྲིད་ཀྱི་ཆེ་མཐོང་སྤྲད། རྗེས་སུ་ཁྱུང་པོ་སྤུང་སད་ཀྱིས་བསླུས་ནས་བཙན་པོ་ལ་གློ་བ་རིང་བར་གྱུར། བཙན་པོའི་བཀའ་མ་བརྩིས་ནས་མཁར་བཟུང་བས་མཐར་བཙན་པོས་ཁོ་བསད་ཅིང་མཁར་གཤིགས་པ་རེད།Bhk

བཞི། སད་མ་ཀ བུད་མེད་འདི་སྟག་རི་གཉན་གཟིགས་ཀྱི་སྲས་མོ་ཡིན་ཞིང་། ཁོ་མོ་ཞང་ཞུང་རྒྱལ་པོའི་བཙུན་མོ་ལ་བཏང་། ཞང་ཞུང་ནས་བཙུན་མོའི་གོ་ས་ཡག་པོ་མ་ཐོབ་ཅིང་། བཙན་པོ་སྲོང་བཙན་གྱི་དུས་སུ་བཙན་པོའི་ཕོ་ཉ་རྨང་ཆུང་ལ་ངག་འཕྲིན་དང་གཡུ་རྙིང་སུམ་ཅུ་བསྐུར། ཡང་ཆུ་སླ་ང་གང་དང་དུང་གསེར་དུག་མདེལ་བཅས་བསྐུར་ནས་མཚོན་དོན་གྱི་བརྡ་མང་དུ་བཏང་། བཙན་པོས་ཁོ་མོའི་ཐབས་ལ་བརྟེན་ནས་ཞང་ཞུང་ལ་དམག་དྲངས་ཏེ་དབང་དུ་བསྡུས།Bhk

ལྔ། དབས་དབྱི་ཚ། མི་འདི་ཟིང་པོ་རྗེའི་བློན་པོ་ཡིན་ཞིང་། རྗེས་སུ་ཁོའི་ནུ་བོ་གཞན་གྱིས་བཀྲོང་ཤོར་ནས་མི་སྟོང་དགོས་ཚུལ་ཟིང་པོ་རྗེ་ལ་ཞུས་ཀྱང་རྗེས་དེ་ལ་ཁ་ཡ་མ་བྱས་པས་ཁོ་ཡིད་ཆད་དེ་སྟག་རི་གཉན་གཟིགས་ལ་མགོ་འདོགས་ཞུས་ཤིང་། གནམ་རི་སྲོང་བཙན་གྱི་དུས་སུ་ཟིང་པོ་རྗེ་ལ་དམག་དྲངས་དུས་དམག་སྣ་འདྲེན་མཁན་དུ་བསྐོས། མི་འདི་སྟག་རི་གཉན་གཟིགས་དང་གནམ་རི་སྲོང་བཙན་གྱི་བློན་པོ་ཆེ་གྲས་ཡིན་ལ། ལོ་ལོན་ནས་ཉི་མ་ལྡེ་དགོས་པའི་དུས་སུ་བཙན་པོ་སྲོང་བཙན་ལ་བཅར་ནས་རེ་བ་ཞུས་པས། བཙན་པོ་དངོས་སུ་ཁོའི་ཁྱིམ་ལ་ཕེབས་ནས་གསོལ་རེས་རྒྱ་ཆེར་བསྩལ་ཅིང་། རྗེ་བློན་མི་བདུན་དང་ཁོའི་ཕྱོགས་ཀྱི་མི་བདུན་བཅས་མནའ་བོར་ཞིང་། ཁོ་ཤི་དུས་བཙན་པོས་དངོས་སུ་དུར་འཇུག་བྱས་པ་དང་། མི་རྒྱུད་ཕྱི་མ་རྣམས་ལ་གསེར་ཡིག་བསྩལ་བར་ཁས་བླངས། འདི་དང་བཙན་པོ་སྲོང་བཙན་གཉིས་ཀྱིས་བླངས་པའི་མགུར་ཞིག་ཀྱང་ཡོད། Bhk

དྲུག མྱང་ཙེང་སྐུ།  མི་འདི་ཟིང་པོ་རྗེའི་བློན་པོ་ཞིག་ཡིན་རུང་། ཁོའི་གཉེན་ཉེ་ལ་གཞན་གྱིས་ཐུབ་ཚོད་བྱས་པས་ཟིང་པོ་རྗེ་ལ་གུ་ཡངས་དགོས་ཚུལ་ཞུས་ཀྱང་ཟིང་པོ་རྗེས་རྒྱབ་སྐྱོར་མ་བྱས་པས། ཁོ་སེམས་ཕམ་ནས་དབས་དབྱི་ཚ་དང་ཁ་འཆམས་ནས་སྟག་རི་གཉན་གཟིགས་ལ་མགོ་འདོགས་ཞུས་པ་རེད། ཟིང་པོ་རྗེ་ལ་དམག་དྲངས་དུས་སྔོན་དུ་གསང་མྱུལ་བྱེད་དུ་འགྲོ་མཁན་ཡིན། སྲོང་བཙན་གྱིས་ཟིང་པོ་རྗེ་དབང་དུ་བསྡུས་རྗེས་དབས་དབྱི་ཚ་དང་འདི་གཉིས་ཀྱིས་བླངས་པའི་མགུར་ཞིག་ཀྱང་ཡོད། གནས་རི་སྲོང་བཙན་གྱིས་འདི་ལ་བྱ་དགའ་མཁར་དང་བྲན་ཁྱིམ་སྟོང་ལྔ་བརྒྱ་བསྩལ་བར་བྱས། Bhk

གོང་གི་བློན་པོ་འདི་དག་གིས་གཙང་དང་། དྭགས་པོ། ཞང་ཞུང་། ཟིང་པོ་རྗེ་སོགས་རྒྱལ་ཕྲན་མང་པོ་དབང་དུ་བསྡུས་ཤིང་། དམག་དང་སྲིད་ཁྲིམས་ཀྱི་རྣམ་པ་རྒྱ་བསྐྱེད་ཅིང་། བོད་ཆེན་པོའི་རྒྱལ་རབས་ཞེས་དར་བའི་རྩེ་མོར་སོན་པའི་སྲིད་འབྱོར་གྱི་རྒྱུ་རྐྱེན་མང་དུ་བསྐྲུན་པར་མ་ཟད། རྒྱལ་རབས་གསུམ་གྱི་རིང་ལ་ཆབ་སྲིད་ཀྱི་མངའ་ཁོངས་རྒྱ་བསྐྱེད་ཅིང་རང་ཚུགས་ཐུབ་པའི་རྒྱལ་ཁབ་ཀྱི་རྣམ་པ་གསལ་པོ་དོད་པ་ནི་མི་སྣ་འདི་དག་གི་མཛད་རྗེས་ཡིན་པར་བསྙོན་དུ་མེད་དོ།།Bhk

支持此新闻
返回首页

དཔྱད་བརྗོད་སྤེལ་བ། ད་ལྟ་བསྡོམས་པའི་དཔྱད་བརྗོད་་ཙམ་སྤེལ་ཡོད། འདི་ནས་གཟིགས།
ར་སྤྲོད་ཨང་། མིང་མེད།
པར་ལྡན་འོས་སྦྱོར།
ནང་དོན་གསར་ཤོས།
རྡེབ་ཚད་མང་ཤོས།
མཉམ་སྤྱོད་བྱེད་གནས།