༄༅།། དཔའ་རིས་སྐད་ཀྱི་སྦྲའི་མིང་གི་ངོས་འཛིན་རི་མོ།
སྤེལ་དུས།  2017-09-13  རྡེབ་ཚད།   ཡོང་ཁུངས། དཔའ་རིས་དམངས་སྲོལ་རིག་གནས།  རྩོམ་པ་པོ། མི་གསལ།  རྩོམ་སྒྲིག་པ། lobsang

640.webp.jpgi8s

གསལ་བཤད།དཔའ་རིས་སྐད་ཀྱི་སྦྲའི་མིང་གི་ངོས་འཛིན་རི་མོ་འདི་རྒན་བསོད་ནམས་ཚེ་རིང་དང་། བ་བཟའ་རྒྱལ་མཚན།སེམས་ཉིད་བྱམས་པ་སོགས་ཤེས་རབ་ཀྱི་རྒན་རྣམས་ཀྱིས་མཛུབ་སྟོན་དང་ཐུགས་ཁུར་གནང་པའི་འོག་ཏུ་བསྒྲུབས་པ་ཡིན། འདིར་སྙིང་ཐག་ནས་བཀའ་དྲིན་ཆེ་ཞུ་ཞུ།i8s

640.webp (1).jpgi8s

སྦྲ་ནི་ནོར་ནག་གི་རྩིད་པས་བཟོས་པའི་ཁང་ཁྱིམ་ལ་ཟེར་ཞིང་། ནག་ནི་ཁྱད་ཆོས་བརྗོད་པའི་མིང་སྟེ། སྦྲའི་ཁ་དོག་ནག་པོ་ཡིན་པའི་ཆ་ནས་དེ་ལྟར་བརྗོད་པ་ཡིན། དབྱིབས་ཀྱི་ཆ་ནས་སྦྲ་ནག་གྲུ་བཞི་ཞེས་འབོད་སྲོལ་ཡང་ཡོད། བོད་མི་རིགས་ཀྱི་འཚོ་བའི་ཁྲོད་སྦྲ་ནག་ཏུ་འཚོ་བ་རོལ་མཁན་མང་ཆེ་བ་འབྲོག་པ་ཡིན་ལ། དེ་ནི་སྦྲ་ནག་འཁྱེར་བདེ་བ་དང་ཕུབ་བདེ་བ་སོགས་སྒོ་ཕྱུགས་ཀྱི་དོན་དུ་རང་འགར་གནས་སྤོར་བྱས་ཆོག་པས། འབྲོག་པའི་དངོས་ཡོད་འཚོ་བའི་དགོས་མཁོ་དང་ཧ་ཅང་འཚམ་པས་རེད། སྦྲ་ཞེས་པའི་མིང་འདི་ནི་ཡིག་སྐད་ཡིན་ཏེ། རོང་པ་རྣམས་ཀྱིས་སྦའམ་རྦ་ཞེས་འབོད་པ་དང་། འབྲོག་པ་རྣམས་ཀྱིས་དུས་རྒྱུན་གྱི་འཚོ་བའི་ཁྲོད་རྭ་ཞེས་འབོད་པ་མ་གཏོགས་སྦྲ་ཞེས་འབོད་མཁན་ཤིན་ཏུ་ཉུང་། མཁས་དབང་དགེ་འདུན་ཆོས་འཕེལ་གྱི་རྒྱལ་ཁམས་རིག་པས་བསྐོར་བའི་གཏམ་རྒྱུད་གསེར་གྱི་ཐང་མ་ལས། མདོ་སྨད་ཀྱི་འབྲོག་པ་རྣམས་ཀྱིས་རེ་ནག་གི་གུར(སྦྲ་གུར་ལ་རེ་ལྡེ་ནག་པོའི་ཟེར)ལ་རྭ་ཞེས་འབོད་ཅེས་གསུངས་ཡོད་ལ། འབྲོག་པའི་བཏགས་ས་ཞིག་ལས་ཀྱང་། རྭ་ནག་ནང་གི་འབྲོག་ནག་ཅེས་པ་དང་། ཡང་གཏམ་དཔེ་ལས་ཀྱང་རྭ་རོག་རོག་དང་ཁང་སྐྱ་སྐྱ་ཞེས་འབྱུང་བ་ལྟ་བུའོ། །i8s

རང་རེའི་བོད་མི་རིགས་ནི་གནའ་སྔ་མོ་ནས་མདོ་དབུས་མཐོ་སྒང་དུ་འཚོ་ཞིང་གནས་ལ། དུས་ཡུན་རིང་བོའི་འཚོ་གནས་ལོ་རྒྱུས་ཁྲོད་ཕུན་སུམ་ཚོགས་པའི་དངོས་པོའི་ལོངས་སྤྱོད་དང་འོད་སྟོང་འབར་བའི་བསམ་བློའི་རིག་གནས་མང་བོ་གསར་དུ་བསྐྲུན་ཡོད་མོད། འདིར་བརྗོད་འདོད་པ་ནི་བོད་མིའི་སྤོ་སྐྱོད་སྡོད་ཁང་སྟེ། སྦྲ་ཡི་ཐོག་མའི་བྱུང་བ་དང་། གྲུབ་ཆ། བྱེད་ནུས། སྦྲ་ཕུབ་སྟངས་དང་སྒྱེལ་པའི་གོ་རིམ་སོགས་མདོ་ཙམ་བརྗོད་རྒྱུ་དེ་ཡིན།i8s

དེ་ཡང་རང་རེའི་མེས་པོ་དག་གིས་ཀྱང་ཟས་སུ་མ་རྨོས་པའི་ལོ་ཏོག་དང་གོས་སུ་ཤིང་ལོ་གྱོན་པའི་དུས་སྐབས་བརྒྱུད་མྱོང་བ་ལོ་རྒྱུས་དེབ་ཐེར་དག་ལས་གསལ་བ་དང་། གདོད་མའི་སྤྱི་ཚོགས་ཀྱི་དུས་སྐབས་སུ། ཁོ་ཚོས་རང་བྱུང་ཁམས་ཆེན་པོར་འཐབ་རྩོད་བྱེད་སྐབས། ཤིང་གི་ཡལ་ག་དང་སྲོག་ཆགས་ཀྱི་རུས་པ། རྡོ་ཆས་སོགས་ལག་ཆ་བྱེད་པ་དང་། འབྱུང་བཞིའི་གནོད་འཚེ་ལས་གཡོལ་ཆེད། བྲག་ཕུག་དང་རྩྭའི་སྤྱིལ་རྗ་སོགས་བཟོས་ནས་གནས་སྡོད་བྱེད་པའི་ཐོག་མའི་རྣམ་པ་བྱུང་བར་མ་ཟད། རི་སྐྱེས་སྲོག་ཆགས་སྒོ་ཕྱུགས་སུ་བཏུལ་ནས་ལོངས་སྤྱོད་ལ་གསོག་འཇོག་བྱེད་པའི་སྲོལ་དར་བ་རེད། ཡིན་ཡང་། ཕྱུགས་རིགས་གཟན་རྩྭར་བརྟེན་དགོས་ཤིང་། བྲག་ཕུག་སོགས་སུ་གནས་སྡོད་བྱས་ན་སྒོ་ཕྱུགས་འཚོ་ཐབས་བྲལ་བས། མེས་པོ་དག་ལ་སྤོ་སྐྱོད་ཀྱི་རྣམ་པའི་འཚོ་གནས་འདུ་ཤེས་སྐྱེས་མོད། ཡིན་ཡང་། བྲག་ཕུག་དང་སྤྱིལ་རྗ་སོགས་འཁྱེར་མི་ཐུབ་པས། དེ་ལ་དཔེ་བྱས་ནས་འགེལ་བདེ་ལ་ཕུབ་སླ་བའི་སྒོ་ཕྱུགས་ཀྱི་སྤུ་ལས་གྲུབ་པའི་སྦྲ་བཟོས་པ་རེད། དེའི་རྣམ་པ་ནི། འགྲོ་དུས་ཤ་རྐང་མ། །འདུག་དུས་ཤིང་རྐང་མ། །(ཁེད)ཞེས་པ་ལྟར། རུ་སྤོ་དུས་སྒོ་ཕྱུགས་ལ་འགེལ་བ་དང་། ཕུབ་ཚེ་ཀ་མང་གིས་གདག་དགོས་པར་བསྟན་པའོ།།i8s

འོ་ན་སྦྲ་ནི་བྱེ་བྲག་དུས་ནམ་ཞིག་ལ་བྱུང་བ་རེད་ཅེ་ན། 《ཆོས་འབྱུང་མཁས་པའི་དགའ་སྟོན》ལས། དང་པོ་གནོད་སྦྱིན་ནག་པོས་དབང་བྱས་ཏེ། …… དེ་ནས་རེ་ཏེ་མགོ་གཡག་བདུད་ཀྱིས་བྱས'ཞེས་པ་ལས། རེ་ཏེ་ཞེས་པའི་ཐ་སྙད་བྱུང་བར་གཞིགས་ན། བོད་མིའི་སྤོ་སྐྱོད་སྡོད་ཁང་སྟེ། སྦྲ་བྱུང་ནས་ད་ལྟའི་བར་མ་མཐའ་ཡང་ལོ་ངོ་སུམ་སྟོང་ལྷག་གི་ལོ་རྒྱུས་ལྡན་པར་ངེས།i8s

640.webp (2).jpgi8s

支持此新闻
返回首页

དཔྱད་བརྗོད་སྤེལ་བ། ད་ལྟ་བསྡོམས་པའི་དཔྱད་བརྗོད་་ཙམ་སྤེལ་ཡོད། འདི་ནས་གཟིགས།
ར་སྤྲོད་ཨང་། མིང་མེད།
པར་ལྡན་འོས་སྦྱོར།
ནང་དོན་གསར་ཤོས།
རྡེབ་ཚད་མང་ཤོས།
མཉམ་སྤྱོད་བྱེད་གནས།