༄༅།། རྨ་ཡུལ་ཁྲི་ཀའི་མཐོང་ཐོས་ཅལ་ཅོལ་མ།
སྤེལ་དུས།  2018-01-05  རྡེབ་ཚད།   ཡོང་ཁུངས། བོད་ཀྱི་སློབ་འབྲིང་དྲ་བ།  རྩོམ་པ་པོ། བསེ་ཀུན་དོང་།  རྩོམ་སྒྲིག་པ། lobsang

ཁྲི་ཀར་ཇོ་མཇལ་ལན་གཅིགjdz

ཕྱི་ལོ་༢༠༡༨ལོའི་དབྱར་ཟླ་ར་བར་མཚོ་ལྷོ་ཁུལ་སློབ་གསོ་ཅུས་རྩ་འཛུགས་བྱས་པའི་སློབ་གྲྭ་ཆུང་འབྲིང་གི་དགེ་རྒན་གསོ་སྦྱོང་འཛིན་གྲྭ་ཞིག་ཁྲི་ཀའི་རྨ་འགྲམ་སློབ་ཆུང་(河阴小学)ནས་བསྡུས། jdz

 ང་རང་གསོ་སྦྱོང་འཛིན་གྲྭ་ཞུགས་པའི་གླེགས་འདི་དང་བསྟུན་ནས་ཁྲི་ཀའི་མི་འགྱུར་རྟེན་གསུམ་ལ་མཇལ་བའི་འདུན་པ་ཞིག་དབང་མེད་དུ་སྐྱེས་ཤིང་། ཐོག་མར་ཁྲི་ཀའི་ཇོ་ཇོ་ལྷ་ཁང་དུ་བསྐྱོད་པ་ཡིན།jdz

ལྷ་ཁང་སྒོ་ཁར་མི་རེ་གཉིས་ཀྱིས་སྐད་མཐོན་པོས་འུར་རྒྱག་བཞིན་པ་ནི་བཟའ་འཁོན་རྒྱག་པའི་ཁྱིམ་ཚང་ཞིག་རེད། བསྐོར་ལམ་དུ་གཞོན་ནུ་གཉིས་ཀྱིས་དབང་བོ་སྐྱོན་ཅན་གྱི་འདེད་འཁོར་ཞིག་འདྲུད་པའི་ནང་དུ་རྒན་པོ་ལོ་ན་ཧ་ཅང་བགྲེས་པ་ཞིག་སྐྱོར་ནས་ལྷ་ཁང་དུ་འགྲོ་བཞིན་པ་ནི་ཁོང་ཚང་གི་སྤོ་བོ་ཡིན་ཚོད་འདུག   ང་རང་ལྷ་ཁང་དུ་འཛུལ་ནས་ཕྱག་གསུམ་འཚལ་རྗེས་མཆོད་མེ་སྐོང་འབྲིང་གསུམ་བསྒྲོན་ཏེ་གསོལ་བ་འདེབས་ཞོར་ཡར་དགྱེས་པ་ན་ཇོ་བོ་ཡིད་བཞིན་ནོར་བུའི་ཞལ་རས་ཝ་ལར་ཤར་ཞིང་ཡིད་སེམས་འཁྲེང་ནས་འབྲུ་ཡང་མི་འཁྲོལ་བར་མིག་མཐའ་མཆི་མས་བརླན་འོང་། སྟབས་ལེགས་པ་ཞིག་ལ་མཇལ་བ་སྐོར་ཞིག་ཕྲེང་སྒྲིག་ཅིང་དཀོར་གཉེར་ཨ་ཁུས་རྟེན་བཤད་དང་སྨོན་ལམ་གསུང་བཞིན་འདུག་པ་དང་འཕྲད། བདག་གིས་ཀྱང་སྐྱབས་འཇུག་གི་སྨོན་ལམ་ཤོག་ངོས་སུ་ཕབ་ནས་ཞུ་རྟེན་དང་བཅས་ཨ་ཁུར་འབུལ་པ་ཡིན།  jdz

ཨ་ཁུས་བུས་ཕ་ལ་ཞུ་བ་ཇི་བཞིན་ཁ་བརྡའི་ལམ་ནས་གོ་རིམ་ཡོད་ཅིང་མ་ཆད་མ་ལུས་པར་མཇལ་བ་རེ་རེའི་རེ་འདོད་ལྟར་ཁྱིམ་ཚང་བསྡུམས་པ་དང་ཚོང་ལས་དར་བ།  རྒྱུགས་ཆེ་འབྲིང་ཆུང་གསུམ་གྱི་སྐར་འབྲས་ལོན་པ།མི་ལ་ན་ཚ་མེད་ཅིང་ཕྱུགས་ལ་གོད་ཁ་མེད་པ། ནམ་ཚ་ལེགས་ཤིང་ལོ་ལེགས་འབྱུང་བ་སོགས་ཚེ་འདིའི་བར་ཆད་ཞི་བ་དང་སྐྱེ་སྒོ་གཏད་པ་དང་ཕྱི་མ་ངན་སོང་དུ་མི་ལྟུང་ཞིང་ཞིང་མཆོག་གང་དུ་སྐྱེས་བར་སྐྱབས་འཇུག་ཞུ་སྟངས་འདིས་མཇལ་བ་གང་གི་དད་པའི་སྤུ་ལོང་མི་གཡོ་བ་ཞིག་ཡོད་མི་སྲིད།jdz

གོ་ཐོས་ལྟར་ན་ལྷ་ལྡན་ཇོ་བོ་དང་བྱིན་རླབས་མཉམ་པར་གྲགས་པའི་ཁྲི་ཀའི་ཇོ་བོ་ཞེས་ཡོངས་སུ་གྲགས་པ་འདི་ཉིད་རབ་རྒྱལ་ལྕགས་རྟའི་ཐ་སྐར་ཟླ་བའི་དཀར་ཕྱོགས་རྒྱལ་བ་དང་པོའི་ཤཱཀྱའི་རྒྱལ་པོ་དགུང་ལོ་བཅུ་གཉིས་པའི་སྐུ་ཚད་ཅན་ལྔ་ལྡན་ལོངས་སྤྱོད་རྫོགས་པའི་སྐུའི་རྣམ་པ་ཅན་ལྟ་བས་ཆོག་མི་ཤེས་པ་ལེགས་པར་གྲུབ། རྗེ་དགེ་འདུན་ལེགས་བཤད་བསྟན་པ་རྒྱ་མཚོ་ཉིད་ཀྱིས་རྡོ་རྗེ་སློབ་དཔོན་མཛད་དེ་དགེ་འདུན་བཅུ་ཕྲག་ཟུང་གིས་དཔལ་རྡོ་རྗེ་འཇིགས་བྱེད་ཀྱི་སྒོ་ནས་རབ་གནས་ཞི་རྒྱས་སྦྱིན་བསྲེག་དང་བཅས་སྦྱོར་དངོས་འཇུག་གསུམ་ཐམས་ཅད་དམ་པ་གོང་མའི་ཕྱག་བཞེས་བཞིན་མཛད་པར་གྲགས།  jdz

 jdz

མི་ཉག་མཆོད་རྟེན་ལ་མཇལ་བ།jdz

ང་རང་གླ་གཏོང་རླངས་འཁོར་ལས་བབས་ནས་མདུན་དུ་གོམ་པ་འགའ་སྤོས་པ་ན་ཁྲི་ཀའི་རྨ་ཆུའི་འགྲམ་ངོགས་སུ་ཀྲོང་ངེ་འགྱིང་བའི་མཆོད་རྟེན་ཞིག་མཐོང་ཐུབ་ཅིང་། ན་འདམ་གྱི་སྟེང་ལ་ཤིང་སྐེ་གྱ་གྱུར་མཁྱིད་ནས་མཆོད་རྟེན་གྱི་མདུན་སྒོར་འཐེན་འདུག     བདག་ཤིང་གི་ལན་ཀན་ལ་འཇུས་ཏེ་མི་ཉག་མཆོད་རྟེན་གྱི་ཚོམས་ཆེན་ནས་དད་པའི་ཕྱག་གསུམ་འཚལ་ཞིང་མཆོད་མེ་འབྲིང་བ་གསུམ་བསྒྲོན་ཞོར་སྐྱབས་འཇུག་དང་སྨོན་ལམ་འདེབས་པའི་སྐབས་དེར། ལྷ་ཁང་གི་འུར་སྒྲ་ཇེ་ཆེར་སོང་ཡང་མི་མང་བོ་ཞིག་མཐོང་རྒྱུ་མ་བྱུང་། ང་རང་མཚར་ཉམས་ཀྱིས་ཕྱོགས་ཕྱོགས་སུ་བལྟས་ཀྱང་སྔར་བཞིན་ཅི་ཡང་མཐོང་མ་ཐུབ། མཚམས་ཤིག་ལ་སྣེ་ཤན་པ་ཞིག་གིས་རྒྱ་རྒྱ་མོ་སྐོར་ཞིག་འཁྲིད་ནས་མཆོད་རྟེན་གྱི་ནང་སྐས་ལས་བབས་ཏེ།  རྒྱ་སྐད་ཀྱིས“ མི་ཉག་མཆོད་རྟེན་ཞེས་པ་མཚོ་ལྷོ་ཁུལ་ཁྲི་ཀ་རྫོང་རྨ་སྲིབ་གྲོང་རྡལ་མངའ་ཁོངས་ཀྱི་མཆོད་རྟེན་ཞིག་ཡིན་ལ། རྨ་སྲིབ་གྲོང་རྡལ་གྱི་ཁོངས་གཏོགས་ཁྲིན་པེ(མཁར་བྱང)སྡེ་བའི་བྱང་ཕྱོགས་ཀྱི་རྨ་འགྲམ་དུ་ཡོད་དེ། འདི་ནི་ཁྲི་ཀ་ས་ཆའི་བྱིན་རླབས་ཅན་གྱི་རྟེན་བཞིའི(མཆོད་རྟེན་འདི་དང་། གདོང་སྣའི་ཐུགས་རྗེ་ཆེན་པོ། ཇོ་ཇོ་ལྷ་ཁང་། ལྷ་དཀར་བོ་བཅས)ནང་གི་གཅིག་ཡིན་ལ། མཚོ་སྔོན་གྱི་མཆོད་རྟེན་ཨང་དང་པོར་ཡང་བསྔགས་ཀྱིན་ཡོད།ངག་རྒྱུན་ལྟར་ན། མཆོད་རྟེན་འདི་ནི་བོད་བཙན་པོའི་རྒྱལ་རིང་ཞེ་གཅིག་པ་ཁྲི་གཙུག་ལྡེ་བཙན་རལ་བ་ཅན་མདོ་སྨད་དུ་དམག་དོན་གཟིགས་ཞིབ་ལ་ཕེབས་དུས། ཉིད་ཀྱི་དབུ་རལ་གཟུངས་གཞུག་ཏུ་ཕུལ་ནས་བཞེངས་པ་ཞིག་ཡིན་པར་མ་ཟད། དུས་ཕྱིས་ས་སྐྱ་པཎ་ཊི་ཏ་ཀུན་དགའ་རྒྱལ་མཚན་མཆོག(1182-1251)ཧོར་རྒྱལ་ཨོ་གོ་ཏའི་སྲས་ཆུང་བ་གོ་དན་གྱིས་གདན་དྲངས་པ་བཞིན་ལང་ཇུ(ད་ལྟའི་ཀན་སུའུ་ཞིང་ཆེན་གྱི་ཝུའུ་ཝེ་ས་ཆ)ལ་ཕེབས་པའི་ལམ་བར་དུ་གནས་འདིར་ཕེབས་ཏེ་ཆེད་དུ་རབ་གནས་མཛད་མྱོང་བ་ཞིག་ཡིན་པར་གསུངས། མཆོད་རྟེན་འདིའི་ཉེ་གམ་དུ་མི་ཉག་བློ་གྲོས་དར་རྒྱས(1675—1754)ཞུ་བས་ཕྱག་འདེབས་གནངས་པའི་རི་བོ་དགེ་ལྡན་པའི་དགོན་པ་མི་ཉག་དགོན་བཀྲ་ཤིས་ཆོས་འཕེལ་གླིང་ཞེས་པ་ཡོད། ”ཅེས་མཚམས་སྦྱོར་གནང་བྱུང་།jdz

ང་རང་མཆོད་རྟེན་གི་སྟེང་ལ་འཛེགས་མ་བཟོད་པར་སྐོར་ལམ་གྱི་མ་ཎི་བསྐོར་ནས་སྐོར་བ་ལན་གསུམ་རྒྱབ་རྗེས་མི་ཉག་མཆོད་རྟེན་གྱི་རྟེན་བཤད་རྡོ་རིང་བཙལ་ཞོར་སྒོར་བུད་པ་ན་གྲྭ་བ་ཞིག་དང་འཕྲད་བྱུང་། བདག་གིས་ཨ་ཁུར་མཆོད་རྟེན་འདིའི་ནང་རྟེན་མཚམས་སྦྱོར་གང་ན་ཡོད་པར་དྲིས་ཀྱང་ཨ་ཁུས་མཚམས་སྦྱོར་བྱང་བུ་གཞི་ནས་མེད་པར་གསུངས་བྱུང་བས་བདག་ལ་སྔམ་པ་རིང་བོ་ཞིག་དབང་མེད་དུ་ཤོར།jdz

     ༢༠༡༧-༧-༡༨   jdz

支持此新闻
返回首页

དཔྱད་བརྗོད་སྤེལ་བ། ད་ལྟ་བསྡོམས་པའི་དཔྱད་བརྗོད་་ཙམ་སྤེལ་ཡོད། འདི་ནས་གཟིགས།
ར་སྤྲོད་ཨང་། མིང་མེད།
པར་ལྡན་འོས་སྦྱོར།
ནང་དོན་གསར་ཤོས།
རྡེབ་ཚད་མང་ཤོས།
མཉམ་སྤྱོད་བྱེད་གནས།