༄༅།། དམངས་གླུར་དཔྱད་པ་ཉིན་བྱེད་འདྲེན་པའི་སྐྱ་རེངས།
སྤེལ་དུས།  2018-01-04  རྡེབ་ཚད།   ཡོང་ཁུངས། དུས་དེབ།  རྩོམ་པ་པོ། ཨ་སྐྱབས་རྒྱལ་སྲས་ཚང་།  རྩོམ་སྒྲིག་པ། lobsang

བོད་རིགས་ནི་ལས་ལ་བརྩོན་ཞིང་དཔལ་རྩ་ཆེ་ལ་བློ་གྲོས་དང་ཤེས་རབ་ཀྱི་དཔལ་འཛིན་པའི་མི་རིགས་ཤིག་ཡིན་པ་དང་། ལོ་རྒྱུས་སུ་དམངས་ཁྲོད་ཀྱི་ཚིགས་བཅད་སྙན་ངག་གང་མང་མང་གསར་རྩོམ་བྱས་ཡོད་པ་རེད། བོད་ཀྱི་པཎྚི་ཏ་དང་བོ་ས་སྐྱ་གོང་མ་རིན་པོ་ཆེ་ཀུན་དགའ་རྒྱལ་མཚན་གྱི་ཚ་བོ་འགྲོ་མགོན་ཆོས་རྒྱལ་འཕགས་པའི་དུས་སུ། ཤོང་ལོ་ཙཱ་བ་རྡོ་རྗེ་རྒྱ་མཚན་གྱིས་ས་སྐྱའི་གཙུག་ལག་ཁང་དུ《སྙན་ངག་མེ་ལོང》གི་གཞུང་འདི་ཆ་ཚང་བར་བོད་སྐད་དུ་མ་བསྒྱུར་བའི་སྔོན་ལ་བོད་དུ་སྙན་ངག་གི་ལུགས་སྲོལ་མ་དར་བ་ལྟ་བུ་ཞིག་གསུངས་པ་དེ་ནི《སྙན་ངག་མེ་ལོང》གཞུང་འདི་བོད་ལ་མ་བསྒྱུར་གོང་སྙན་ངག་ཇི་ལྟར་རྩོམ་ཚུལ་གྱི་རིགས་པའི་གཞུང་ལུགས་མེད་པའི་དོན་ཡིན་པ་མ་གཏོགས། དེའི་སྔོན་ལ་བོད་དུ་སྙན་ངག་ཅེས་པ་དེ་རྩ་བ་ནས་མེད་པ་དང་དེ་རྩོམ་མི་ཤེས་པའི་དོན་མ་ཡིན་ནོ།། ཅི་ཞེ་ན། སྙན་ངག་ཐམས་ཅད་ཐོག་མར་སྤྱི་ཚོགས་ཀྱི་འཚོ་བ་དངོས་ལས་བྱུང་བ་དང་། སྤྱི་ཚོགས་དང་རང་བྱུང་ཁམས་ཀྱི་ཆོས་དངོས་འགའ་ཞིག་མི་རྣམས་ཀྱི་སྣང་ངོར་འཆར་ནས་སྨིན་པའི་འབྲས་བུ་དེ་རིག་རྩལ་གྱི་རྣམ་པའི་སྟེང་ནས་ཕྱིར་མངོན་པ་ཡིན། སྙན་ངག་གི་གཞུང་ལུགས་མ་དར་སྔོན་དུ་བོད་མི་རང་ཉིད་ལ་ཐུན་མིན་གྱི་ཁྱད་ཆོས་ལྡན་པའི་སྙན་ངག་ཡོད་པའི་མི་ཚད། ཧ་ཅང་གིས་དར་རྒྱས་ཆེན་པོ་བྱུང་ཡོད་པ་ནི་རྩོམ་རིག་ལོ་རྒྱུས་སྟེང་ནས་བདེན་དཔང་བྱས་ཡོད་པ་རེད། དཔེར་ན། 《སྙན་ངག་མེ་ལོང》ནི་དུས་རབས་བཅུ་གསུམ་སྐབས་སུ་བོད་དུ་འགྱུར་བ་ཡིན་ལ། དེ་ལས་ཀྱང་། ཤིན་ཏུ་སྔ་བའི་ཡན་ཆད་མི་ལོ་སྟོང་ཕྲག་གཅིག་ལྷག་སྔོན་གྱི་རྒྱ་ཤ་ཅུའི་གཏེར་ཡིག་ལས་ཁྱུང་བོ་སྤུང་ཟད་དང་ཞང་སྣང་གཉིས་ཀྱིས་བླངས་པའི་གླུ་དང་། སྲོང་བཙན་སྒམ་པོ་དང་མགར་སྟོང་བཙན་གཉིས་ཀྱིས་བླངས་པའི་མགུར། བཙུན་མོ་སད་གར་གར་གྱིས་བླངས་པའི་མགུར། ཁྲི་འདུས་སྲོང་གིས་བླངས་པའི་མགུར། ཁེ་རྒད་རྒྱལ་ཏེ་རེ་མདོ་སྨང་གི་བླངས་པའི་མགུར། ཁྲི་ལྡེ་གཙུག་བརྟན་རིང་རྗེ་འབངས་ཀྱིས་བླངས་པའི་མགུར་ལ་སོགས་པའི་མགུར་གླུ་ཤིན་ཏུ་མང་ངོ་།། ནང་སྒོས་ཉེ་ལམ་ལོ་འགའི་རིང་ལ་མདོ་དབུས་ཁམས་གསུམ་ཀུན་ཏུ་འཚོལ་སྡུད་དང་དཔར་བསྐྲུན་བྱས་པའི་བོད་གནའ་རབས་ནས་དར་བའི་གླུ་གཞས་སོགས་ཀྱི་རྣམ་གྲངས་ནི་བགྲང་གིས་མི་ལང་བ་དང་། ནང་དོན་རྒྱ་ཆེ་ཞིང་ཕུན་སུམ་ཚོགས་པ་ནི་ཚང་མས་མཁྱེན་བཞིན་ནོ།།ME2

བོད་རིགས་དམངས་ཁྲོད་སྙན་ངག་གི་ཡ་གྱལ་ཏེ་གླུའི་སྐོར་རོབ་ཙམ་བརྗོད་པར་བྱའོ།།ME2

༡ གླུའི་བྱུང་བ་དང་མཚན་ཉིད་མདོར་ཙམ་བརྗོད་པ།ME2

          དེ་ལ་གླུ་ཞེས་པ་འདི་ནི་རང་རེ་བོད་རིགས་ངལ་རྩོལ་མི་དམངས་རྣམས་ཀྱིས་ཐོན་སྐྱེད་ངལ་རྩོལ་བྱེད་པ་དང་འབྲེལ་ནས་དུས་སྐབས་དེའི་ཕྱི་རོལ་གྱི་ཆོས་དངོས་འགའ་ཞིག་རང་ཉིད་ཀྱི་བློ་ཡིད་ཀྱི་འཆར་སྒོ་སོགས་མཚོན་པར་བྱེད་པ་དང་། ཉམས་མྱོང་བརྒྱུད་སྤེལ་དང་ཤེས་རབ་ཀྱི་རྩལ་འགྲན་པའི་ངོར་ཚུལ་སྣང་ཞིང་། སླར་ཡང་དེ་དག་ངོས་འཛིན་བྱས་ནས་རང་གི་བསམ་པའི་བརྩེ་དུང་དང་དགའ་སྡུག་སྐྱོ་སྣང་དང་བློ་ཆེད་དུ་སྙན་མོ་སྐད་ཀྱི་འགྱུར་ཁུགས་ལ་དྲངས་ནས་བླངས་པའི་དམངས་ཁྲོད་རྩོམ་རིག་ནང་གསེས་ཀྱི་སྙན་ངག་ཚིགས་བཅད་མའི་རིགས་ཤིག་ཡིན།ME2

          སྤྱིར་གནའ་རབས་ཀྱི་དུས་སུ། བོད་ཀྱི་གླུ་དང་མགུར་གཉིས་དོན་གཅིག་མིང་གི་རྣམ་གྲངས་ཡིན། འདི་བྱུང་བའི་དུས་ནི་རྒྱ་ཤ་ཅུ་ས་ཆ་ནས་བཏོན་པའི་བོད་ཀྱི་གཏེར་ཡིག་གི་དོན་ལྟར་ན། གངས་ཅན་བོད་ཀྱི་རྒྱལ་རབས་དགུ་བ་སྤུ་དེ་གུང་རྒྱལ་གྱི་རིང་ནས་བཟུང་སྟེ་བྱུང་བའི་མགུར་གླུ་ཁ་ཤས་བཀོད་འདུག་པར་ང་ཚོའི་བློ་ཡིད་དུ་གླུ་ནི་སྐབས་དེ་ལས་ཀྱང་བྱུང་སྔ་བའི་ངེས་ཤེས་དབང་མེད་དུ་འབྱུང་བར་འགྱུར། སྔོན་ལོ་ངོ་སྟོང་ཕྲག་གཉིས་ཡས་མས་སུ་བརྩམས་པའི་རྒྱ་ནག་དཔེ་གཞུང་ཞིག་ཏུ…སེམས་གཡོས་པ་ལས་ངག་གྲུབ་པ་དང་། ངག་གིས་བརྡ་ཇི་བཞིན་ཏུ་མ་འཕྲོད་པས་སྨྲེ་ངག་ཐོན་ཞིང་། སྨྲེ་ངག་གིས་ཀྱང་བརྡ་མ་འཕྲོད་པས་གླུ་བྱུང་བ་དང་། གླུ་ཡིས་ཀྱང་མ་ནུས་པར་སྟངས་སྟབས་བྱུང་བའོ་ཞེས་ཐུན་མོང་གི་ཆོས་ཉིད་ལྡན་པའི་གསུང་སྒྲོས་དེ་རིགས་ལ་བརྟག་ན། གླུ་ནི་གདོད་མའི་དུས་སུ་རང་རེ་མེས་པོ་རྣམས་ཀྱིས་སྐད་ཆ་བཤད་ཤེས་པའི་འཕྲོ་རང་འཕྲོར་བྱུང་བ་དང་དེ་བྲོ་གར་ལས་ཀྱང་བྱུང་སྔ་བ་ནི་རིགས་པས་གྲུབ་ཅིང་བདེན་དཔང་བྱས་ཡོད་པ་རེད།ME2

༢ གླུ་ཡི་རྣམ་གྲངས་དང་སྒྱུ་རྩལ་གྱི་ཁྱད་ཆོས་སྐོར།ME2

          གླུ་དང་མགུར་ནི་འདོད་རྒྱལ་གྱི་མིང་ཡིན། བོད་སིལ་བུར་མ་ཐོར་བའི་སྔོན་གྱི་ལོ་རྒྱུས་དཔྱད་གཞི་དག་ལ་དབྱེ་ཞིབ་བྱས་པ་ལྟར་ན། སྐབས་དེར། གླུ་ནི་མགུར་དང་མགུར་ནི་གླུ་སྟེ་གཉིས་ཀའི་ལུས་སྲོག་རྒྱན་གང་གི་ཐད་ནས་ཀྱང་གཅིག་འདྲ་ཡིན། ཕྱིས་སུ་བོད་ཀྱི་སྤྱི་ཚོགས་འཕེལ་རྒྱས་དང་འཕོ་འགྱུར་བྱུང་བའི་རྐྱེན་དུ་མའི་དབང་གིས་གླུ་དང་མགུར་གཉིས་ཀ་ཡང་ཁ་བྲལ་དུ་སོང་ནས་ཆོས་ལུགས་པ་རྣམས་ཀྱིས་བཞེངས་པའི་གླུ་ལ་མགུར་ཟེར་ཏེ། དཔེར་ན་རྗེ་བཙུན་མི་ལ་རས་པའི་མགུར་ལྟ་བུ་དང་། མི་སྐྱ་རིམ་གྲས་ཀྱི་དཔོན་པོ་དང་ངལ་རྩོལ་མི་དམངས་ཁྲོད་ནས་ལེན་པ་ལ་གླུ་ཟེར། བོད་ཀྱི་གཅིག་གྱུར་མ་ཉམས་པའི་སྐབས་ཀྱི་མགུར་གླུའི་ནང་དོན་ནི་ཆབ་སྲིད་དང་ལོ་རྒྱུས་དང་འཚོ་བ་སོགས་ལ་ཆུ་དང་འོ་མ་འདྲེས་པ་བཞིན་དུ་འབྲེལ་འདྲིས་ཤིན་ཏུ་ཆེ་སྟེ། དཔེ་བཞག་ན། རྒྱལ་བོ་སྲོང་བཙན་སྒམ་པོ་དང་བློན་པོ་བློ་ཐུབ་ཅན་དབའ་དབྱི་ཚབ་ཕ་ཚན་སོགས་མནའ་བསྐྱལ་བའི་དུས་སུ་བླངས་པའི་མགུར་གླུ་ནི་འདི་ལྟ་སྟེ།ME2

          ཡར་མོ་ནི་ཆུ་ཐུངས་ཀྱིས།། མདོ་ནས་ནི་རྩང་དུ་བསྲིངས།། ཡར་མོ་ནི་ཞིང་ཆངས་ཀྱིས།། ལྷོ་ནས་ནི་བྱང་དུ་བསྐྱེད།། འཐམ་འཐམ་ནི་འདུ་འདུ་ན།། ངག་རྗེས་ནི་མྱིས་མི་བརྗོད།། འགྲོ་འགྲོ་ནི་འཆམ་འཆམ་ན།། ཆགས་ལྷོ་ནི་ཆུས་ཀྱི་སྣང་།། ད་ནས་ནི་ཕན་ཆད་དུ།། ཁྱོད་ཀྱིས་ནི་ང་མ་གཏང་།། ང་འིས་ནི་ཁྱོད་མྱི་གཏང་།། ང་འིས་ནི་ཁྱོད་གཏང་ན།། དགུང་མཐའ་ནི་སྲུང་དུ་རུང་།། ཁྱོད་ཀྱིས་ནི་ང་གཏང་ན།། ངས་པོ་ནི་རྨད་དུ་རུང་།།ME2

          གོང་དུ་བླངས་པའི་གླུའི་དོན་ནི། སྔར་ཡར་ལུང་ཆུ་བོ་སྣ་ཐུང་ཡང་།། དུས་ད་ལྟ་མདོ་ནས་གཙང་དུ་བསྲིངས།། སྔར་ཡར་ལུང་གཙང་བོ་ཞེང་ཆུང་ཡང་།། དུས་ད་ལྟ་ལྷོ་ནས་བྱང་དུ་བསྐྱེད།། ལར་མི་མང་ཚོགས་སུ་འདུ་ས་ནས།། གཏམ་ཕྲ་མ་བཅུག་ཀྱང་ངས་མི་ཉན།། ཁྱོད་གར་སོང་ས་ལ་སླེབས་ན་ཡང་།། རྐང་ཆགས་ལྷམ་ཆུ་ཡིས་མི་སྲིད།། དུས་ཉི་མ་དེ་རིང་ཕན་ཆད་དུ།། ཁྱོད་དབྱི་ཚབ་ཕ་བུས་ང་མ་གཏོང་།། ང་བཙན་པོ་ཡིས་ཀྱང་ཁྱོད་མི་གཏོང་།། ལར་བདག་གིས་ཁྱོད་ཚོ་བཏང་བ་ན།། སྟེང་ནམ་མཁའི་ལྷ་ཡིས་བཀའ་ཆད་ཕོག། ཁྱོད་དབྱི་ཚབ་ཕ་བུས་ང་བཏང་ན།། ང་བཙན་པོས་བཀའ་བཀྱོན་འབེབས་སུ་རུང་།། ཞེས་པ་ལྟ་བུའོ།།ME2

          དེ་ནས་སྤྱི་ཚོགས་འཕེལ་རྒྱས་ཀྱི་གོམ་རིམ་ལ་བསྟུན་ནས་གླུའི་ནང་དོན་དང་རྣམ་གྲངས་སོགས་སྔར་ལས་ཕུན་སུམ་ཇེ་ཚོགས་སུ་གྱུར་ཏེ། ད་ལྟ་མདོ་ཁམས་ཀྱི་གླུའི་རྣམ་གྲངས་ལ་མཚོན་ན། ཐོག་མར་འགོ་རྩོམ་པའི་གླུ་དང་། བསྟོད་གླུ། བག་གླུ། སྨྲེང་གླུ། ཁ་མཚར། གླུ་ཤགས། དྲི་གླུ། བར་བྱོལ་གླུ། བཀྲ་ཤིས་བདེ་ལེགས་ཞུ་བའི་གླུ་སོགས་ཡོད་དེ། ལོ་གསར་ཚེས་མགོ་དང་། དུས་ཆེན་ལ་དགའ་སྟོན་རྟེན་འབྲེལ་ཞུ་བའི་སྐབས་དང་། སྟོན་མོ་གཉེན་སྒྲིག་ལ་སོགས་པའི་དུས་སུ། ས་དེ་གའི་ཕོ་མོ་རྒན་གཞོན་ཚང་མ་མཉམ་གཅིག་ཏུ་ཚོགས་ནས་དགའ་དགའ་སྐྱིད་སྐྱིད་ངང་ཤ་མར་ཐུད་གསུམ་དང་། ཞོ་འོ་མ་བདུད་རྩི་གསེར་སྐྱེམས་བཅས་ལོངས་སུ་སྤྱོད་པ་དང་ལྷན་དུ་གླུ་ལེན་གར་རྩེ་བྱེད་པའི་ལུགས་སྲོལ་ཆགས་ཡོད།ME2

          གླུའི་ནང་དོན་ལ་དང་བོ་བསྐལ་བ་བྱུང་རབས་དང་ས་གཞི་ཆགས་རབས། དུས་བཞིའི་འགྱུར་ལྡོག ལོ་རྒྱུས་དང་ཆོས་ལུགས། ལུགས་སྲོལ་གོམས་འདྲིས། རྩི་ཤིང་དང་སྲོག་ཆགས། འཇིག་རྟེན་པའི་སྐྱིད་སྡུག་ངལ་རྩོལ་དང་ཐོན་སྐྱེད་བཅས་བརྗོད་བྱ་རྒྱ་ཆེ་ཞིང་གཏིང་ཟབ་ལ་རྗོད་བྱེད་སྙན་ངག་གི་གཟུགས་ཅན་གྱི་རྒྱན་དང་། དཔེ་རྒྱན། རབ་བཏགས། བསྡུས་བརྗོད། མཚུངས་སྦྱོར་སོགས་དོན་རྒྱན་ནམ་སྒྲ་རྒྱན་གྱིས་རྣམ་པར་བརྒྱན་པ་དང་། མཐོ་དམའ་ཕྲ་རགས་རིང་ཐུང་གི་དབྱངས་ཀྱི་ངེས་པ་བདུན་གྱེར་ཏེ་རྣ་བར་སྙན་ཞིང་ཡིད་དུ་འོང་བའོ།།ME2

          དབུས་གཙང་གི་གླུ་ནི་ཚན་པ་གཅིག་དང་། ཚན་པ་གཅིག་དེ་ཚེག་ཁྱིམ་དྲུག་དང་ཚིག་རྐང་བཞི་ཡིན། མདོ་ཁམས་ཀྱི་གླུ་ཕལ་ཆེར་ཚན་པ་གསུམ་སྟེ་དང་བོ་གཉིས་པ་དཔེ་དང་། གསུམ་པ་དཔེ་ཅན་ནམ། ཚན་པ་གཅིག་དེ་ཚིག་བར་དྲུག་ནས་བརྒྱད་བཅས་ཡོད།ME2

          གླུའི་སྒྱུ་རྩལ་ལ་མཚོན་ན། གླུའི་དཔེ་རྣམས་མང་ཚོགས་དང་འབྲེལ་འདྲིས་ཟབ་ཅིང་གསལ་རེ་བ་མ་ཟད། དཔེ་རྣམས་དོན་དང་མཐུན་ཞིང་དོན་རྣམས་དཔེ་ལས་གོ་བ་དང་། འཚོ་བའི་རྨང་གཞི་རབ་ཏུ་ཆགས་ཤིང་སྙན་ངག་གི་རོ་བཅུད་ཕུན་སུམ་ཚོགས་པ་དང་རྟོགས་པ་འཆར་ཡན་རིང་ལུགས་ཀྱི་རྣམ་འགྱུར་དང་ལྡན་པ། ཁ་གསལ་བ། གོ་སླ་བ། སྡེབ་སྦྱོར་ལེགས་པ། གཞན་གྱི་ཡིད་འགུགས་ཤིང་འཕྲོག་པའི་གསོན་ཉམས་དང་ལྡན་པ། བློ་ལ་འཛིན་བདེ་བ། དབྱངས་ལ་གྱེར་ནས་ལེན་དུས་ཚིག་གི་ལྷུ་འགྲིག་ཅིང་སྙན་ཞིང་འཇེབས་པ་བཅས་ལ་སོགས་པའོ།།ME2

          གཞན་ཡང་གླུའི་ནང་དུ་སྲིད་པ་ཆགས་གླུ་དང་། འཇིག་རྟེན་ཆགས་གླུ། ཁྱུང་དང་རུས་སྦལ་གྱི་གླུ། རུས་སྦལ་གྱི་གླུའི་བཤད་པ་སོགས་ཚིག་རྐང་ཧ་ཅང་མང་བོའི་གླུ་ཡང་ཡོད་དེ། སྲིད་པ་ཆགས་གླུ་ལ་མཚོན་ན་ཚིག་རྐང་བརྒྱད་དང་གྱ་ལྔ་ཡོད་པ་དང་། ནང་དོན་འཇིག་རྟེན་འདིའི་ས་གཞིའི་ཆགས་ལུགས་འབྱུང་བ་རྣམ་བཞི། བར་བསྐལ་བཞི། ཕྱོགས་བཞིའི་མཚམས་བརྒྱད་ཀྱི་བྱུང་ཚུལ། གླིང་གཞི་གླིང་ཕྲན་བརྒྱད། དུས་བཞི་དང་དུས་ཚིགས་ཉེར་བཞི་ཆར་ཆུ་བྱུང་ཚུལ་སོགས་ཡོད་དོ།།ME2

          འཇིག་རྟེན་ཆགས་ཚུལ་གྱི་རྩོམ་ལུས་ནི་དྲི་བ་དྲིས་ལན་གྱི་ཚུལ་དུ་བརྩམས་པ་དང་། ནང་དོན་ནི་ཕྱི་སྣོད་ཀྱི་འཇིག་རྟེན་ནས་ནང་བཅུད་ཀྱི་སེམས་ཅན་བར་ཕལ་ཆེར་རྒྱ་གཞུང་ནང་ལུགས་མཐུན་པ་དང་། རྩོམ་ཡིག་འདི་རྩོམ་མཁན་སུ་ཡིན་པའི་མིང་མེད་ཀྱང་། རྙིང་མའི་སློབ་དཔོན་རྒྱལ་བ་ཀློང་ཆེན་རབ་འབྱམས་པ་དྲི་མེད་འོད་ཟེར༼  ༡༣༠༨ནས༡༣༦༣ ༽  གྱིས་མཛད་པའི་ཀློང་ཆེན་མཛོད་བདུན་གྱི་ནང་གསེས་ཡིད་བཞིན་མཛོད་དང་། ཀོང་སྦྲུལ་ཡོན་ཏན་རྒྱ་མཚོས ༼  ༡༨༡༣ནས༡༨༩༩ ༽  མཛད་པའི་ཤེས་བྱ་ཀུན་ཁྱབ་སོགས་ཀྱི་གཞུང་དུ་ཐོར་བུ་ཙམ་བཤུས་པ་འདྲ། དེ་ནས་ཁྱུང་དང་རུས་སྦལ་གྱི་གླུ་ནི་མདོར་བསྡུས་ཏེ་རྩ་བ་ལྟ་བུ་དང་། ཁྱུང་ཆེན་གྱི་གླུ་བཤད་པ་དང་རུས་སྦལ་གྱི་གླུ་བཤད་པ་ནི་ཅུང་ཟད་རྒྱས་པར་འཕྲོས་ཏེ་འགྲིལ་བ་འདྲ། གླུ་འདི་གོང་གི་སྲིད་པ་དང་འཇིག་རྟེན་ཆགས་གླུ་གཉིས་དང་བསྡུར་ན་གནའ་བོའི་དམངས་ཁྲོད་ངག་རྩོམ་གྱི་ནང་དོན་དང་ཁྱད་ཆོས་ལྡན་ཏེ། དཔེར་ན། དང་བོ་གནམ་དང་གོ་ལ་ཁ་འཕྲོད་པའི་དུས་སུ། གནམ་ཡར་ལ་འགྱོག་མཁན་ཁྱུང་ཆེན་ཡིན་པ་དང་ས་མར་ལ་གནོན་མཁན་ནི་རུས་སྦལ་ཡིན་པ་བཅས་དྲི་བ་དྲི་ལན་གྱི་ཚུལ་དུ་བཤད་ཡོད་པ་མ་ཟད། རུས་སྦལ་གྱི་གླུ་བཤད་པའི་མཇུག་ཏུ་ད་རུང་སྨེ་བ་དགུའི་རྩི་ཚུལ་དང་སྤར་ཁ་བརྒྱད་ཀྱི་ཆགས་ཚུལ། ལོ་འཁོར་བཅུ་གཉིས་ཀྱི་མཐུན་ཚུལ། ལོ་རྒན་དྲུག་ཅུའི་འཁོར་ཚུལ་སོགས་ཀྱང་ཡོད་དེ་ལ་ལ་ལྷ་སྒྲུང་གི་རྣམ་པ་ལྡན་ཞིང་། ཁ་ཤས་ནི་ཤེས་བྱའི་རིན་ཐང་ཆེན་པོ་ཞིག་ཡོད་པ་རེད། འོག་ཏུ་དཔེར་བརྗོད་ཙམ་རེ་བཀོད་ན།ME2

          ཡུལ་གྱི་ནི་སྐལ་པོག་པ།། ཁྱུང་ལུང་ནི་རྡུང་མཁར་ཞིག། མུ་པུ་ནི་གཞན་ན་རེ།། བྱི་བལྟས་ནི་ངམ་དང་བྲག། ནང་བལྟས་ནི་གསེར་དང་དབྱིག། བདག་གི་ནི་གཡར་སྔ་རུ་།། མཆིས་སུ་ནི་མ་ཐོ་འམ།། སྐྱ་མོ་ནི་བསེང་བསེང་མོ།། བྲན་གྱི་ནི་སྐལ་པོག་པ། གུ་གེ་ནི་རྐང་བྲན་ཞིག། འཁོལ་དུ་ནི་མ་ཐོའམ།། གུང་གེ་ནི་བདྲིས་ཤིང་སྡང་།། ཟས་གྱི་ནི་སྐལ་པོག་པ།། ཉ་དང་ནི་གྲོ་མཆིས་ཏེ།། འཚལ་དུ་ནི་མ་ཐོའམ།། ཉ་གྲོ་ནི་བཆའ་ཞིང་དཀའ།། ཕྱུགས་ཀྱི་ནི་སྐལ་པོག་པ།། ཤ་དང་ནི་རྐྱང་མཆིས་སྟེ།། འཚོ་ར་ནི་མ་ཐོའམ།། ཤ་རྐྱང་ནི་བཙའ་ཞིང་རྒོལ།། ཀྱེ་བྱང་འབྲོག་ནི་ཡ་པི་ན།། ཕོ་མོའི་ནི་འགྲོག་གཆིག་པ།། བྱང་འབྲོག་ནི་འབྲོང་དགུམ་ན།། པུ་ནས་ནི་ཁུས་འདེབས་པ།། ལྡོང་ཏོང་ནི་འཕན་གྱིས་ཐོག། མདའ་ནས་ནི་གཡབ་འདོར་བ།། སྐྱིའི་ནི་ཤ་དང་སྤྲུག། དབུས་ནས་ནི་དཔོར་འཕེན་པ།། ཡར་གྱི་ནི་ལྷོ་དང་རྔེགས།། པུ་ནས་ནི་ཁུས་བཏབ་ཚིང་།། མདའ་ནས་ནི་གཡབ་བོར་ནས།། དེ་འི་ནི་བར་བར་དུ།། ཕོ་མའི་ནི་འབྲོག་བཀུམ་ཞིང་།། ཐུར་ཐུར་ནི་པྱིང་བའི་བཅུད།། རུ་རུས་ནི་ལྡོག་ཏོང་སྩལད།། ཝོ་ཤོག་ནི་ཤ་སྤྲུག་སྩལ་དང་།། མཆིས་བའི་ནི་རུ་སྲུབས་ལ།། སྟག་གི་ནི་ཤ་བཏགས་ཤིང་།། གཡས་སུ་ནི་མ་ཡོ་ཞིག། གཡོན་དུ་ནི་མ་རྡལ་ཆིག། གཡས་སུ་ནི་ཡོ་བ་ན།། སོ་བྱ་ནི་གྲོ་བོ་ཆུང་།། གཡོན་དུ་ནི་རྡལ་བ་ན།། སྲམ་བུ་གོང་ཏེ་དངུལ།། མར་གྱི་ནི་ཆང་ཆང་ལ།། གུར་གྱིས་ནི་མ་བནབས་ན།། སང་པྱི་ནི་གནངས་སླད་ན།། སྲམ་གྱི་ནི་འཚལ་ཏ་རེ།། ཉ་མོ་ནི་མཐོང་རྒོལ་ཞིག། མཐོང་རྒོལ་ནི་མཐོང་ལ་རྒོལ།། མཆིལ་པའི་ནི་སྣར་ཐོགས།། རིང་གི་ནི་གོད་ལན་དང་།། སའི་ནས་ནི་ཤེས་མྱིག་གཉིས།། ག་མྱི་ནི་གྱི་གོ་ལྟ།། གཉེན་དུ་ནི་མི་མཐུན་ཏེ།། ཇེ་ཉེ་ནི་ཇེ་ཉེ་ན།། ཡར་ལ་ནི་དགུང་དང་ཉེ།། དགུང་སྐར་ནི་སི་ལི་ལི།། ཇེ་ཉེ་ནི་ཇེ་ཉེ་ན།། གྱ་སྐར་ནི་བྲག་དང་ཉེ།། བྲག་སྐར་ནི་སི་ལི་ལི།། སྤུར་བ་ནི་ཆབ་དང་ཉེ།། གྱུར་སྲམ་ནི་པྱོ་ལ་ལའ།། ཉེན་ཀར་ནི་དོག་དང་ཉེ།། འབྲས་དྲུག་ནི་སི་ལི་ལི།། མལ་དྲོ་ནི་ཀླུམ་དང་ཉེ།། སྐྱི་སེར་ནི་སྤུ་རུ་རུ།། ཇེ་ཉེ་ནི་ཇེ་ཉེ་ན།། ར་ཉི་ནི་བྱུག་པ་ཐུ།། ཡར་གྱི་ནི་བྱེ་མ་ལ།། ལྷན་ལྷན་ནི་འགྲོས་མོ་འདི།། སྐྱི་འི་ནི་པུར་ཐབས་སུ།། ཟ་དུར་ནི་བཏབ་ཀྱང་རུང་།།ME2

གོང་གི་མགུར་འདི་ད་ལྟའི་སྐད་དུ་བསྒྱུར་ན།ME2

          མི་ང་ལ་ཡུལ་གྱི་སྐལ་ཐོབ་པ།། མཁར་ཆེན་པོ་ཁྱུར་ལུང་རྔུལ་མཁར་རེད།། སྟོབས་ཆེ་བས་གཞན་ལ་རེ་དགོས་མེད།། ཕྱི་བལྟས་ན་ངམ་རོང་བྲག་གིས་བསྐོར།། ནང་བལྟས་ན་གསེར་དང་དབྱིག་གིས་ཁེངས།། དེ་བདག་གི་གཡར་སྔའི་རྒྱན་དང་འདྲ།། རྒྱན་དེ་འདྲ་མཆིས་པ་ཨེ་མ་མཚར།། སེམས་སྐྱ་མོའི་སྡུག་བསྔལ་བསང་ཐབས་བྲལ།། མི་ང་ལ་བྲན་གྱི་སྐལ་ཐོབ་པ།། སྟོད་མངའ་རིས་གུ་གེའི་སྐར་ཕྲན་རེད།། འཁོར་དེ་འདྲ་མཆིས་པ་ངོ་མཚར་ཡང་།། བྲག་གུ་གེ་པ་རྣམས་འདྲིས་ཤིང་སྡང་།། མི་ང་ལ་ཟས་ཀྱི་སྐལ་ཐོབ་པ།། གྲོ་བག་ཕྱེ་ཉ་ཡི་ཤ་དག་མཆིས།། ཟས་དེ་འདྲ་མཆིས་པ་ངོ་མཚར་ཡང་།། གྲོ་ཉ་ཤ་ཟ་བཞིན་ཇེ་ཁ་རེད།། མི་ང་ལ་ཕྱུགས་ཀྱི་སྐལ་ཐོབ་པ།། ཤ་རྭ་རི་རི་རྐྱང་སྔོན་མོ་རེད།། ཕྱུགས་ཤ་རྐྱང་འཚོ་བ་ངོ་མཚར་ཡང་།། ཤ་རི་རྐྱང་འཚོ་བཞིན་ཇེ་རྒོད་རེད།། ཀྱེ་བྱང་འབྲོག་རྩྭ་ཐང་ཡ་གི་ན།། འབྲོང་རྒོད་པོ་དེ་འདྲ་བཀུམ་འདོད་ན།། དུས་ལྡོང་སྟོང་ཅན་གྱི་འཕན་པོ་རྣམས།། འབྲོང་བྲེ་སེར་རྭ་རྩེ་ནོར་པོ་ཅན།། ལུང་བའི་ཕུ་ནས་ཀི་ཞིག་ཐོབས།། སྐྱིད་ཆུའི་བརྒྱུད་ཀྱི་ཤ་དང་སྤུག། ལུང་བའི་ཕྱོགས་ཀྱི་ལྷོ་དང་རྔོགས།། དེ་ཡི་བར་ནས་འུར་ཞིག་རྒྱོབ།། ཚུལ་དེ་ལྟར་ཕུ་ནས་ཀི་འདེབས་ཤིང་།། ལུང་བའི་མདོ་ནས་ལན་བྱིན་ཏེ།།  དེའི་བར་ནས་བྲེ་སེར་འབྲོང་བཀུམ་ན།། འབྲོང་རུ་ཐུར་ཕྱིང་བ་མཁར་གྱི་བཅད།། མི་ང་ལ་ཡུལ་གྱི་སྐལ་ཐོབ་པ།། མཁར་ཆེན་པོ་ཁྱུང་ལུང་རྔུལ་མཁར་རེད།། སྟོབས་ཆེ་བས་གཞན་ལ་རེ་དགོས་མེད།། ཕྱི་བལྟས་ན་ངམ་རོང་བྲག་གིས་བསྐོར།། ནང་བལྟས་ན་གསེར་དང་དབྱིག་གི་ཁེངས།། དེ་བདག་གི་གཡར་སྔའི་རྒྱན་དང་འདྲ།། རྒྱན་དེ་འདྲ་མཆིས་པ་ཨེ་མ་མཚར།། གློ་རུ་མ་ལྡོང་དང་སྟོབ་ལ་སྩོལ།། ཤ་པགས་པ་ལྷོ་དང་རྔེགས་ལ་བྱིན།། རྐང་ཡན་ལག་ཤ་དང་སྤུག་ལ་སྩོལ།། ཉ་འཛིན་བྱེད་ལྕགས་ཀྱུའི་རྩེ་མོ་ལ།། ཞེས་པ་ལྟ་བུའོ།།ME2

          སྟག་དམར་ཡག་ཤ་ཡ་བུམ་བུ་ཐོགས།། གཡས་སུ་མ་ཡོ་མ་གཟུར་ཅིག། གཡོན་དུ་མ་མཁྱོག་མ་འདའ་ཨང་།། གལ་ཏེ་གཡས་སུ་ཡོན་པ་ན།། གྲེ་ཆུང་སོ་བྱས་བཟའ་གྲབས་ཡོད།། གལ་ཏེ་གཡོན་དུ་འདས་པ་ན།། ཆུ་སྲིན་ནག་པོས་མིད་གྲབས་ཡོད།། དོན་དེ་ཕྱིར་མར་ལ་འཕྱང་འཕྱག་སྟེ།། དུས་དེ་འཕྲལ་ཉ་མོ་མ་བཟུང་ན།། སང་གནངས་ཀའི་ཉི་མ་སླེབས་པའི་ཚེ།། སྲམ་ནག་པོའི་ཁ་ཡི་ཟས་སུ་འགྱུར།། དེ་ལྟ་བུའི་ཉ་མོ་མཐོང་རྒོལ་ཞིག། ལུས་རྩལ་གྱིས་རྟགས་ཤིང་རྒོལ་ཡང་རྒོལ།། དེ་མཆིས་པའི་སྣ་ལ་མྱུར་དུ་ཐོགས། མཐོ་ནམ་མཁའི་ལམ་གྱི་དགུ་ཚིགས་དང་།། དམའ་དོག་མོ་ས་ཡི་ཆུ་མིག་གཉིས།། འགྲོགས་བསམ་ཀྱང་གཉེན་དུ་མི་མཐུན་ཏེ།། ཐག་ཇེ་ཉེ་ཇེ་ཉེ་སོང་བ་ན།། གནམ་དགུ་ཚིགས་ཨ་སྔོན་དགུང་དང་ཉེ།། དགུང་ཨ་སྔོན་རྒྱུ་སྐར་འོད་ལམ་ལམ་།། ཐག་ཇེ་ཉེ་ཇེ་ཉེ་སོང་བ་ན།། སའི་ཆུ་མིག་བླ་སྒར་བྲག་དང་ཉེ།། བྲག་དཀར་བོ་སིལ་ལེར་གཏོར་ལ་ཉེ།། མཁར་སྤུར་བ་ཉེ་ཉེ་ཆབ་དང་ཉེ།། ཆུའི་ནང་ན་ཆུ་སྲམ་སྔོན་མོ་འཕྱོ།། ཕོ་བྲང་ཉེན་ཀར་དོག་དང་ཉེ།།འབྲས་ས་ལུ་ལྗང་བ་སྔོ་ལྡེམ་ལྡེམ།། མལ་དྲོ་གུང་དཀར་ཀླུམ་དང་ཉེ།། ཀླུམ་ཡ་གསུམ་གྲང་རླུང་འུར་འུར་ལྡང་།། ཐག་ཇེ་ཉེ་ཇེ་ཉེར་སོང་བ་ན།། ལྗོན་ཤིང་ཤ་ཉེ་ཤུག་པ་མང་།། ཡར་སྟོད་ཕྱོགས་བྱེ་མའི་ཐང་ཆེན་དུ།། ག་ལེར་འགྲོ་བའི་མི་ཆེན་དེ།། སྐྱིད་ཆུ་སྔོན་མོའི་གཞུང་ལ་བསྐྱུར།། ཉ་སྲམ་དག་གི་སྲས་སུ་རུང་།།ME2

          ཞེས་གོང་གི་མགུར་གླུ་འདི་ལེན་མཁན་ནི་རྒྱལ་བོ་སྲོང་བཙན་སྒམ་པོའི་གཅུང་མོ་སད་མར་དཀར་ཞེས་བྱ་བ་དེ་རེད། སྲོང་བཙན་སྒམ་པོས་ཆབ་སྲིད་ཀྱི་དགོས་མཁོ་དབང་གིས་རང་གི་གཅུང་མོ་སད་མར་དཀར་དེ་ཞང་ཞུང་གི་རྒྱལ་བོ་ལི་མྱི་རྷྱ་ལ་བག་མར་བྱིན། འོན་ཀྱང་། རྒྱལ་བོས་སད་མར་དཀར་མ་འདོད་པར་ཆེན་མ་ཤེ་བཟའ་དང་སྙིང་ཉེ་བར་བྱས། དེའི་ཕྱིར། སད་མར་དཀར་ཡིད་ཆད་ནས་མཚོ་མ་ཕམ་དུ་སོང་ནས་ལོགས་སུ་བསྡད། སྲོང་བཙན་གྱིས་གཏམ་དེ་གསན་རྗེས། སད་མར་དཀར་གྱིས་དེ་ལྟར་བྱས་ན་ཆབ་སྲིད་ཀྱི་དཀྲུགས་མར་འགྱུར་བར་དོགས་ནས། བློན་པོ་སྤུག་གྱིམ་བཙན་རྨང་ཆུང་བྱ་བ་ཕོ་ཉར་མངགས་ཏེ། དེ་ལྟར་མ་བགྱིད་བར་ལིག་མྱི་རྷྱའི་སོ་ནམ་དང་བུ་སྲིད་ཟུངས་ཤིག་ཅེས་བཀའ་བསྒོས་པས། སད་མར་དཀར་གྱིས་གླུ་འདི་བླངས་པ་རེད། མགུར་འདིའི་ནང་དུ་བཙན་མོས་སད་མར་དཀར་རང་ཉིད་ཀྱི་སྡུག་བསྔལ་མཚོན་པ་མ་ཟད། ཞང་ཞུང་གི་རྒྱལ་བོ་ལིག་མྱི་རྷྱ་དེ་བྱང་འབྲོག་ཐང་གི་འབྲོང་ཞིག་ལ་དཔེ་བྱས་ནས། གཅེན་པོ་སྲོང་བཙན་གྱི་རུས་མིང་ལྡོང་དང་སྟོང་། ཤ་དང་། སྤུག་དང་། ལྷོ་དང་། རྔོགས་ལ་སོགས་པའི་བློན་པོ་ཆེ་འབྲིང་ཆུང་གསུམ་རྣམས་དང་གཅིག་སྒྲིལ་གྱིས་འཐབ་དུ་ཡོང་ཕོད་ན། སྲོང་བཙན་བཞུགས་སའི་མཁར་རྫོང་ཕྱིང་བ་སྟག་རྩེ་དཔེ་མཚོན་བྱས་པའི་བོད་ཀྱི་རྒྱལ་ཁབ་ཀྱི་རྒྱ་བསྐྱེད་ཐུབ་པ་དང་།  གལ་ཏེ་ཐེ་ཚོམ་སྐྱེས་ནས་དུས་འགྱངས་པར་བྱས་ན། ཞང་ཞུང་ནི་གཞན་དབང་དུ་བསྡུ་ངེས་པས། ཁྱོད་རྗེ་བློན་རྣམས་ཀྱིས་དམག་ཁྲིད་དེ་མྱུར་མོར་ཤོག་ཅིག་ཅེས་པའི་གསང་བརྡ་བཏང་བ་རེད། མགུར་གླུ་འདི་ཁུར་རྟེན་དུ་ཕྱག་རྗེས་བཏབ་པའི་གཡུ་རྙིང་སུམ་ཅུ་བསྐུར། དེའི་དོན་ནི། ཁྱོད་ཚོས་ཞང་ཞུང་རྒྱལ་བོར་རྒོལ་ཕོད་ན་གཡུ་བཟང་བོ་འདི་ཐོགས་དང་། མི་ཕོད་ན་བུད་མེད་དང་འདྲ་སྟེ་སྲོག་ཞུ་གྱོན་ཅིག་ཅེས་པའི་དོན་རྣམས་སྲོང་བཙན་ཀྱིས་དཔྱད་པས་རྟོགས་ཏེ། རྗེ་བློན་རྣམས་དམག་གྲོས་བྱས་ཏེ་མཐར་ཞང་ཞུང་དབང་དུ་བསྡུས་སོ།།ME2

          གོང་གི་མགུར་གླུ་འདི་ནི་ད་ལྟའི་སྔོན་གྱི་ལོ་ངོ་ཆིག་སྟོང་སུམ་རྒྱའི་དུས་སུ་བླངས་པ་རེད། གླུ་འདིའི་ལུས་དང་སྲོག་དང་རྒྱན་བཅས་ལ་བརྟགས་ན། སད་མར་དཀར་ནི་སྐབས་དེའི་གླུ་མ་དང་སྙན་ངག་མཁན་ཁྱད་པར་དུ་འཕགས་པ་ཞིག་ཡིན་པའི་མི་ཚད། རང་རེ་བོད་རིགས་ཀྱི་གླུ་གདོད་མའི་དུས་སུ་བྱུང་བ་དང་སྲོང་བཙན་གྱི་སྐབས་ལ་ཐོན་དུས། ཆེས་མཐོ་བའི་ཆུ་ཚད་དུ་སླེབས་ཡོད་པ་ནི་སད་མར་དཀར་ལགས་ཀྱི་གླུ་ལས་ཀྱང་གསལ་བོར་ཤེས་ཐུབ་པ་རེད།ME2

          ངལ་རྩོལ་གྱི་གླུ་ལ་མཚོན་ན་ཡང་མང་སྟེ། ལུག་རྫིའི་གླུ་དང་། རྔོན་པའི་གླུ། མར་དཀྲུགས་པའི་གླུ། འཐག་ཐག་པའི་གླུ། ས་རྡོ་ཁུར་བའི་གླུ། ས་བཅགས་པའི་གླུ། ལུད་གསོག་པའི་གླུ། ལོ་འབྲེག་པའི་གླུ། གདན་འཇོག་པའི་གླུ། ཤོག་རྩིག་པའི་གླུ། གཡུལ་ཁ་རྡུང་བའི་གླུ་སོགས་ཡོད་དེ། ME2

དཔེར་ན་གཡུལ་ཁ་རྡུང་བའི་གླུ་ནི་འདི་ལྟ་སྟེ།ME2

          རྡུང་ས་ཀུན་དགའ་ར་བ་ཡིན།། རྡུང་རྒྱུ་འབྲུ་སྲན་སྣ་ལྔ་ཡིན།། རྡུང་མི་བུ་ཚ་བུ་མོ་ཡིན།། དབྱུག་སྐོར་ཙན་ཏན་སྡོང་བོ་ཡིན།། འཕང་ལོ་གསེར་གྱི་རྡོ་རྗེ་ཡིན།། དབྱུག་རྒྱུན་འབྲོང་ཀོ་མཉེས་མ་ཡིན།།     དབྱུག་མདའ་མདའ་སྙུག་བྱང་མ་ཡིན།། སྡུད་མ་རྨ་བྱའི་སྒྲོ་ཐིག་ཡིན།། ཁར་ཡག་ཚེས་བརྒྱད་ཟླ་བ་ཡིན།། ཅོ་མ་དངུལ་དཀར་བུམ་པ་ཡིན།། འདྲོང་ཚགས་གསེར་སྐུད་སླས་མ་ཡིན།། འཕྱར་མི་སྨན་ཤར་བུ་མོ་ཡིན།། ཞེས་དང་།ME2

ཞིང་འདེབས་པའི་གླུ་ནི།ME2

          ཞིང་དེ་ཡངས་ཤིང་ནང་ལ་ལུང་གཅིག་བསྐྱེལ།། ཕོ་རོག་ནག་ཆུང་ས་ལ་བབས་པ་འདྲ།། ཞིང་དེ་ཡངས་ཤིང་ནང་ལ་ཆུ་གཅིག་གཏོང་།། གནམ་བདེ་སྔོན་མོ་ཐང་ལ་ལྷུང་བ་འདྲ།། ཨ་ཅེ་སྣང་སས་སོན་གཅིག་བཏབ།། གཡོག་མོ་འཛོམ་པ་བུ་ཁྲིད་སོན་གཡོག་རྒྱུགས།། ཞིང་བ་དེ་ལ་རྨོད་ཅིག་བརྒྱབ་པ་ན།། སྤང་སྟོད་ཕྱོགས་ལ་མདའ་མོ་བཏང་བ་འདྲ།། རེས་སྐོར་དེ་ཚོ་ཚུར་ལ་བསྐོར་བ་ན།། ཆུ་འཁོར་གཞུ་མོ་བཀུག་པ་འདྲ།། ཁྱུང་དཀར་མཛོ་ཕོ་གཉིས་ཀྱི་གཉའ་ནས་སྦྲེལ།། འཕྲེད་འཇོག་ཡག་མོ་གསེར་གྱི་འཕྲེད་འཇོག་ཡོད།། ཐོང་བ་ཡག་མོ་གཡུ་ཡི་ཐོང་བ་ཡོད།། ལག་བཟུང་ཡག་མོ་གོ་བོ་གཤོག་བརྒྱངས་འདྲ།། རྭ་དར་ཡག་མོ་དར་ཚོན་སྣ་ལྔ་ཡོད།། འབྲུ་སྣ་དཀར་ནག་འཛོམས་པ་འདི་ནས་བྱུང་།། འཚོ་བ་བདེ་ཞིང་སྐྱིད་པ་འདི་ནས་བྱུང་།།ཞེས་གླུ་ཚིག་འདི་དག་གི་ནང་དུ་བོད་རིགས་མི་དམངས་རྣམས་ངལ་རྩོལ་ལ་དགའ་བའི་ཉམས་འགྱུར་དེ་གསོན་ཉམས་ལྡན་པའི་ངང་མཚོན་ཡོད་པ་རེད།ME2

ཡང་བྱིས་གླུ་ནི།ME2

          ཨ་ཁུ་རྒྱལ་བོ་ཚང་གི་ལ་ཁ་ན།། གྲོ་འབྲུ་ནས་འབྲུ་ཐ་ར་ར།། གྲོ་གྲོ་མ་ཟེར་ལ།། གྲོ་དེ་བྱེའུས་འཐུ་ལ་ཁད།། བྱེའུ་ཐི་བྱེའུ་ཐི་མ་ཟེར་ལ།།བྱེའུ་ཐི་ལོའུ་ལི་འཆའ་ལ་ཁད།། ལོའུ་ལི་ལོའུ་ལི་མ་ཟེར་ལ།། ལོའུ་ལི་ཐང་ལ་ལྡིང་ལ་ཁད།། ཐང་ལ་ཐང་ལ་མ་ཟེར་ལ།། ཐང་ལ་འཇག་མ་སྐྱེས་ལ་ཁད།། འཇག་མ་འཇག་མ་མ་ཟེར་ལ།། འཇག་མ་ར་མས་བཏོགས་ལ་ཁད།། ར་མ་ར་མ་མ་ཟེར་ལ།། ར་མ་སྤྱང་ཀིས་འཆའ་ལ་ཁད།། སྤྱང་ཀི་སྤྱང་ཀི་མ་ཟེར་ལ།། སྤྱང་ཀི་སྒང་ལ་འགྲོ་ལ་ཁད།། སྒང་ལ་སྒང་ལ་མ་ཟེར་ལ།། སྒང་ལ་ཁངས་སྐྱ་འབབ་ལ་ཁད།། ཁངས་སྐྱ་ཁངས་སྐྱ་མ་ཟེར་ལ།། ཁངས་སྐྱ་ཉི་མས་བཞུ་ལ་ཁད།། ཉི་མ་ཉི་མ་མ་ཟེར་ལ།། ཉི་མ་ཚང་ལ་འཇའ་ལ་ཁད།། ཚང་ལ་ཚང་ལ་མ་ཟེར་ལ།།  ཚང་ལ་བྱེའུ་ཕྲུག་འཛུལ་ལ་ཁད།། བྱེའུ་ཕྲུག་བྱེའུ་ཕྲུག་མ་ཟེར་ལ།། བྱེའུ་ཕྲུག་སྡོང་མགོར་འཕུར་ལ་ཁད།། སྡོང་བོ་སྡོང་བོ་མ་ཟེར་ལ།།  སྡོང་བོ་སྟ་རེས་གཅོད་ལ་ཁད།། སྟ་རེ་སྟེ་མ་ཟེར་ལ།། སྟ་རེ་མགར་བས་བརྡུང་ལ་ཁད།། མགར་བ་མགར་བ་མ་ཟེར་ལ།། མགར་བས་ལག་རྩལ་བརྗེད་ལ་ཁད།།ཅེས་བྱིས་པའི་གླུ་ཆུང་འདི་ནི་སྦྱོར་བདེ་བ། ཁ་གསལ་བ། བྱིས་པའི་སེམས་དེ་དང་མཐུན་པའི་ནང་དོན་ལྡན་པ། བྱིས་པར་དགའ་བ་བསྐྱེད་པར་བྱེད་པའི་ཤེས་བྱའི་རིགས་མཆིས་པས་བྱིས་གླུ་བཟང་བོ་ཞིག་ཡིན་པས་སོ།།ME2

          དེ་མིན། བཙན་ཚོད་མེད་ཀྱི་དཔོན་ངན་དང་ཕྱུག་ཚོད་མེད་ཀྱི་ཕྱུག་པོ་དང་ཕྱི་བཙན་འཛུལ་མཁན་བཅས་ལ་སུན་འབྱིན་དང་ངོ་རྒོལ་བྱེད་པར་བྱ་བའི་གླུ་ཡང་ཡོད་དེ། དཔེར་ན། དབུས་གཙང་གི་གླུ་ལ།ME2

          ཞིང་བས་འབད་པས་ལོ་ཏོག། ཞིང་བདག་སྐུ་དྲག་འཕྲོག་སོང་།། ས་ཞིང་མེད་པའི་ཞིང་གཡོག། བཀྲེས་སྐོམ་དབུལ་བས་མནར་སོང་།། ཞེས་དང་།ME2

          ལག་ཏུ་དབྱུག་པ་བཟུང་ནས།། ཟ་མ་འཚོལ་བའི་ཨ་ཇོ།། བསོད་ནམས་མེད་པ་མ་རེད།། བསོད་ནམས་གཞན་གྱི་འཕྲོག་སོང་།། ཞེས་དང་།ME2

          ཆུ་ཆེན་ཡུལ་གྱི་དགྲ་རེད།། ཆུ་ཆུང་ལམ་གྱི་དགྲ་རེད།། ཁྲལ་དང་བུ་ལོན་གཉིས་ཀ། ནམ་ཡང་སོ་སོའི་དགྲ་རེད།། ཅེས་དང་།ME2

          ཨ་ལྕེ་ལྷ་མོ་ལྷ་རེད།། ལྷ་ཡི་ཐུག་པ་ཆུ་རེད།། རྒྱ་ནག་ཤེལ་སྒོ་མི་དགོས།། ཐུག་པའི་ནང་ནས་གཟིགས་ཆོག། ཅེས་དང་།ME2

          འཇམ་པོ་བལ་གྱི་སླས་པའི།། འུར་རྡོ་ཆུ་མིག་དགུ་བསྒྲིགས་།། ཆུ་མིག་གཞུང་ནས་བརྒྱབ་པས།། དབྱིན་ཇིའི་སྣ་ལ་ཐེབས་སོང་།།ཞེས་པ་སོགས་ཚིག་ཉུང་ལ་དོན་རྣོ་བ་དང་གནད་དུ་ཕོག་པའི་ཆབ་སྲིད་དང་ལོ་རྒྱུས་ཀྱི་ནང་དོན་ལྡན་པའི་རྩོམ་སྟངས་འདི་ནི་མུ་མཐུད་དུ་བེད་སྤྱོད་པ་ལས་སྣང་ཆུང་བྱེད་མི་འོས་པ་ཞིག་རེད།ME2

མདོ་ཁམས་ཀྱི་གླུ་ལེན་པའི་རིམ་པ།ME2

དང་བོ། གླུ་འགོ་ལེན་པའི་སྐོར།ME2

          རི་མགོ་རྫ་མགོ་གངས་ཀྱི་རྫོང་།། གངས་བཞུས་ནས་བདུད་རྩི་བསིལ་མར་གྱུར།། ཕ་ཨ་ཁུས་ཆང་སྐལ་དལ་མོར་བཞེས།། དལ་མོར་བཞེས་དང་ཡུན་གྱིས་རྩེ།།ME2

          རི་སྐེད་རྫ་སྐེད་ནགས་ཀྱི་རྫོང་།། ནགས་རྒྱས་ནས་ལོ་མ་ཇ་རུ་ལོག། སྤུན་ན་ཟླས་ཇ་སྐལ་དལ་མོར་བཞེས།། དལ་མོར་བཞེས་དང་ཡུན་གྱིས་རྩེ།།ME2

          རི་གཞོང་ཐང་གཞོང་ནས་ཀྱི་རྫོང་།། ནས་བཏགས་ནས་སྦྲང་དཀར་རྩམ་པར་ལོག། མ་སྲུ་མོས་ཟས་སྐལ་དལ་མོར་བཞེས།། དལ་མོར་བཞེས་དང་ཡུན་གྱིས་རྩེ།།ME2

གཉིས་པ། བསྟོད་གླུའི་སྐོར།ME2

          རྫ་མཐོན་པོ་ཞིག་ལ་གླུ་ཞིག་ལེན།། རྫ་མགོ་དཀར་པོ་གངས་ཀྱིས་བཟུང་།། རྫ་སྐེད་སྔོན་མོ་སྨུག་པས་བསྐོར།། རྫ་འདབས་གཙང་མོ་ཆུ་ཡིས་བསྐོར།། ཇི་འདྲ་འདྲིའི་རི་བོ་ལྷུན་འགྲུབ་ཅིག།ME2

          ཐང་ཆེན་པོ་ཞིག་ལ་གླུ་ཞིག་ལེན།། ཐང་མགོ་གཡང་དཀར་ལུག་གིས་གང་།། ཐང་སྐེད་འབྲི་དང་མཛོ་མོས་གང་།། ཐང་འདབས་རྒྱེའུ་དང་རྒྱ་མོས་གང་།། ཇི་འདྲ་འདྲའི་ཐང་གཞོང་ལས་འགྲུབ་ཅིག།ME2

          སྡེ་ཆེན་པོ་ཞིག་ལ་གླུ་ཞིག་ལེན།། གྲལ་མགོར་ཕ་དང་ཨ་ཁུ་བཞུགས།། གྲལ་སྐེད་བུ་དང་ཚ་བོ་བཞུགས།། གྲལ་རྔ་མ་དང་སྲུང་མོ་བསྐོར་།། ཇི་འདྲ་འདྲའི་སྡེ་བ་ལས་ཅན་ཞིག།ME2

གསུམ་པ། བག་གླུའི་སྐོར།ME2

          དགུང་ཨ་སྔོན་ཚང་ལ་བཅོལ་རྒྱུ་ཡོད།། འབྲུ་ལྗང་ལོ་ད་རུང་ན་ཆུང་ཡིན།། ཆུ་ཆར་བ་ས་ལ་ཉམས་རེ་ཞོག།ME2

          རྫ་ཁྲ་ཡག་ཚང་ལ་བཅོལ་རྒྱུ་ཡོད།། འབྲོང་བྲེ་ལོ་ད་རུང་ན་ཆུང་ཡིན།། རྫ་རྦབ་རྡོ་ས་ལ་ཉམས་རེ་ཞོག།ME2

          གནས་ཕ་མ་གཉིས་ལ་བཅོལ་རྒྱུ་ཡོད།། མ་བུ་མོ་ད་རུང་ན་ཆུང་ཡིན།། གཡུག་ལས་ཀ་ས་ལ་ཉམས་རེ་ཞོག།ME2

བཞི་བ། ཁ་མཚར་གྱི་སྐོར།ME2

          ར་མ་མི་བཟང་མ་ཟེར་ལ།། ཚེ་ཚེ་ར་མའི་སྤུ་མགོ་ན།། མགོ་ནག་མི་ཡི་མགོ་སྐྲ་ཡོད།།ME2

          ར་མ་མི་བཟང་མ་ཟེར་ལ།། ཚེ་ཚེ་ར་མའི་སྤུ་སྐེད་ན།། རྒྱ་ནག་ཁུལ་ཞྭ་འཇོག་བྱེད་ཡོད།།ME2

          ར་མ་མི་བཟང་མ་ཟེར་ལ།། ཚེ་ཚེ་ར་མའི་སྤུ་རྟིང་ན།། སྔགས་རྒན་རྔ་ཆེན་གཡོག་བྱེད་ཡོད།།ME2

ལྔ་བ། སྨྲེང་གླུའི་སྐོར།ME2

          སྐྱ་གསལ་ལེ་སྐྱ་མདའ་གཏོང་དུས་ན།། ང་ད་ལོངས་ཟེར་བའི་ཕ་ཞིག་དགོས།། ཕ་མེད་ན་ནམ་མཁའ་སྟོང་བ་རེད།།ME2

          སེར་གྱི་ལེ་ཉི་རྩེ་འཇོག་དུས་ན།། ང་ད་ཐུངས་ཟེར་བའི་མ་ཞིག་དགོས།། མ་མེད་ན་ཆུ་ཁོལ་འཁྱགས་པ་རེད།།ME2

          དགྲ་ནག་པོ་ཁིས་ནས་འབུད་དུས་ན།། ང་ད་རྒྱུགས་ཟེར་བའི་སྤུན་ཞིག་དགོས།། སྤུན་མེད་ན་མདའ་ཤིང་སྒྲོ་མེད་རེད།།ME2

དྲུག་པ། གླུ་ཤགས།ME2

          ཐང་དཀར་རྒོད་པོའི་གཤོག་འོག་ན།། གཤོག་སྒྲོ་ར་མ་རིགས་ཆ་ཡོད།། བུ་རྩལ་ཆེན་ཡིན་ན་ལེན་གི་ཤོག།ME2

          བྲེ་སར་འབྲོང་གོ་རྭ་བར་ན།། མཚོན་ཆ་ར་མ་རིགས་ཆ་ཡོད།། བུ་སྙིང་སྟོབས་ཡོད་ན་ལེན་གི་ཤོག།ME2

          གླུ་བ་རྒན་པོའི་ལྕེ་སྣེ་ན།། གླུ་ཤགས་ར་མ་རིགས་ཆ་ཡོད།།   ཁྱོད་གླུ་བ་ཡིན་ན་འདྲི་གི་ཤོག།ME2

བདུན་པ། དྲི་བ་དྲིས་ལན།ME2

          དྲི་བ། སྲིད་པའི་བ་ཆུང་བཤའ་དུས་ན།། ཤ་མཐེ་བོང་ཙམ་ཞིག་བོར་ནས་ཡོད།། དེ་བརྐུས་པའི་རྐུན་མ་སུ་ཡིན་ཤོད།ME2

          སྲིད་པའི་བ་ཆུང་བཤའ་དུས་ནས། ཁྲག་ཁམ་གང་ཙམ་ཞིག་བོར་ནས་ཡོད།། དེ་བརྐུས་པའི་རྐུན་མ་སུ་ཡིན་ཤོད།ME2

          སྲིད་པའི་བ་ཆུང་བཤའ་དུས་ན།། ཚིལ་ལག་མཐིལ་ཙམ་ཞིག་བོར་ནས་ཡོང་།། དེ་བརྐུས་པའི་རྐུན་མ་སུ་ཡིན་ཤོད།།ME2

          ལན། སྲིད་པའི་བ་ཆུང་བཤའ་དུས་ན།། ཤ་མཐེ་བོང་ཙམ་ཞིག་བོར་ནས་བོ།། དེ་བརྐུས་པའི་རྐུན་མ་བྱ་ཕོ་ཡིན།། བདེན་མི་བདེན་བྱ་ཕོའི་མགོ་ལ་ལྟོས།།ME2

          སྲིད་པའི་བ་ཆུང་བཤའ་དུས་ན།། ཁྲག་ཁམ་གང་ཙམ་ཞིག་བོར་ནས་བོ།། དེ་བརྐུས་པའི་རྐུན་མ་ལྕུང་ཀ་ཡིན།། བདེན་མི་བདེན་ལྕུང་ཀའི་མཆུ་ལ་ལྟོས།།ME2

          སྲིད་པའི་བ་ཆུང་བཤའ་དུས་ན།། ཚིལ་ལག་མཐིལ་ཙམ་ཞིག་བོར་ནས་བོ།། དེ་བརྐུས་པའི་རྐུན་མ་སྐྱ་ཀ་ཡིན།། བདེན་མི་བདེན་སྐྱ་ཀའི་ཕོ་བར་ལྟོས།།ME2

བརྒྱད་པ། བར་བྱོལ་བའི་གླུ།།ME2

          འབྲོང་དར་མའི་རྨིག་བཞི་ཐོག་ལ་རྒོལ།། སྟག་དར་མའི་མཆེ་བ་མདུང་ལ་རྣོ།། དེ་ཁྲ་ཡག་རྫ་ལམ་མཛའ་རབས་མེད།། ད་སྟག་ཕྲུག་ལངས་ནས་བར་ཞིག་འབྱེད།།ME2

          ཕ་ཨ་ཁུའི་ཁ་ལྕེ་གློག་ཞགས་རེད།། སྤུན་ན་ཟླའི་རིག་པ་མེ་ལོང་རེད།། ཤགས་ཕུ་ནུའི་བར་ལ་མཛའ་རབ་མེད།། ང་བུ་ཆུང་ལངས་ནས་བར་ཞིག་འབྱེད།།ME2

དགུ་བ། བཀྲ་ཤིས་ཞུ་བའི་སྐོར།ME2

          ཇ་ཐབ་དཀར་མོ་གཡང་འཛིན་ན།། མེ་ཏོག་གཡང་འཛིན་ཇ་ཕུད་གཅིག། ཚང་མཛོད་ཀླུ་ཚང་ཕྱུག་མོ་ན།། ལོ་ཆང་མངར་མོའི་ཆང་ཕུད་གཉིས།། དེ་རིང་ཕ་དང་ཨ་ཁུར་འབུལ།། རྒས་ཚེ་ཐག་རིང་བའི་བཀྲ་ཤིས་ཤོག།ME2

          གོ་མཛོད་ལྕགས་མཁར་ཁྲ་མོ་ནས།། རྣོ་དཔལ་རལ་གྲི་འོད་འབར་གཅིག། རྟ་ར་སྟོང་ཤོང་གྲུ་བཞི་ན།། རྟ་འདོ་བ་གསེར་སྒ་འཕྲོ་མ་གཉིས།། དེ་རིང་སྤུན་དང་ན་ཟླར་འབུལ།། བུ་དཔའ་རྩལ་རྒྱས་པའི་བཀྲ་ཤིས་ཤོག།ME2

          རིན་ཆེན་གསེར་མཛོད་གོང་མ་ནས།། གོས་ཆེན་འབྲུག་མའི་གཟི་མདངས་གཅིག། དགོས་འདོད་ནོར་བུའི་བང་མཛོད་ནས།། གཡུ་དྲུག་དཀར་བྱུ་རུའི་རྒྱན་ཆ་གཉིས་།། དེ་རིང་མ་དང་སྲུ་མོར་འབུལ།། བུ་འདབ་ལག་རྒྱས་པའི་བཀྲ་ཤིས་ཤོག།ME2

支持此新闻
返回首页

དཔྱད་བརྗོད་སྤེལ་བ། ད་ལྟ་བསྡོམས་པའི་དཔྱད་བརྗོད་་ཙམ་སྤེལ་ཡོད། འདི་ནས་གཟིགས།
ར་སྤྲོད་ཨང་། མིང་མེད།
པར་ལྡན་འོས་སྦྱོར།
ནང་དོན་གསར་ཤོས།
རྡེབ་ཚད་མང་ཤོས།
མཉམ་སྤྱོད་བྱེད་གནས།